मुंबई : देशभरातील कोट्यवधी ग्राहकांना शतकाहून जास्त काळ सर्वसमावेशक बँकिंग सेवा देणाऱ्या युनियन बँक ऑफ इंडियाने सोमवारी १०१वा स्थापना दिन साजरा केला. या वेळी या बँकेतर्फे तीन नवीन सुविधा दाखल करण्यात आल्या.
शेतकऱ्यांचे उत्पन्न दुप्पट करण्यासाठी व ग्रामीण आणि निमशहरी भागाच्या सर्वांगीण विकासासाठी उपयुक्त असे ‘युनियन संपूर्ण’, ‘ई-वे बिल्स’ ही इनव्हॉइस वैधता सेवा आणि मोबाइल बँकिंग अॅप ‘यूमोबाइल’मध्ये एटीएमची चालू स्थिती प्रदान करणारी ‘एटीएम जियो लोकेटर’ या सेवांचा यात समावेश आहे.
या कार्यक्रमास केंद्रीय अर्थ राज्यमंत्री अनुराग ठाकूर हे प्रमुख पाहुणे म्हणून उपस्थित होते. केंद्रीय अर्थसचिव राजीव कुमार आणि युनियन बँक ऑफ इंडियाचे व्यवस्थापकीय संचालक राजकिरण रायही या वेळी उपस्थित होते.
अनुराग ठाकूर म्हणाले, ‘नवकल्पना आणि तांत्रिक प्रगतीच्या काळात पद्धतशीर, कार्यक्षम आणि पारदर्शक बँकिंगची आवश्यकता असून, युनियन बँक ऑफ इंडियाने या संदर्भात एक मानदंड निश्चित केला आहे.’
वित्त सचिव राजीव कुमार म्हणाले, ‘युनियन बँक ऑफ इंडियासाठी ही एक ऐतिहासिक घटना आहे आणि ही संधी साधून यापुढील काळात आणखी दैदिप्यमान उंची गाठण्यासाठी मी त्यांना शुभेच्छा देत आहे. ग्राहकांच्या हितासाठी विविध नवीन उत्पादने सादर करण्यात युनियन बँक ऑफ इंडिया आघाडीवर आहे आणि आता ती बँकिंग उद्योगात अव्वल स्थान मिळविण्याच्या दृष्टीने विस्तार करण्याच्या मार्गावर आहे.’
युनियन बँक ऑफ इंडियाचे व्यवस्थापकीय संचालक व मुख्य कार्यकारी अधिकारी राजकिरण म्हणाले, ‘युनियन बँकेला उद्योजक, व्यावसायिक, शेतकरी, विद्यार्थी, महिला, नव मध्यमवर्गीय आणि दुर्बल घटकांची पिढ्यानपिढ्या स्वप्ने साकार केल्याचा अभिमान आहे. आमच्या शंभर वर्षाच्या प्रवासात बँक सामाजिक उत्थान, समुदाय सेवा आणि राष्ट्रीय प्राधान्यक्रमात अर्थपूर्ण योगदान देत आहे. युनियन बँक ही न्यू इंडियाची सर्वाधिक पसंती असलेली बँक बनण्यास सर्वथा योग्य आहे. हा महत्त्वाचा टप्पा आमचे मूलभूत सिद्धांत अबाधित राखून नवकल्पनांचा अवलंब करण्याच्या अथक प्रयत्नांचा पुरावा आहे.’